《綠袖子》用台語紹介古早的旋律

《Greensleeves 綠袖子》(青色的手䘼)是一首流傳數百年的英格蘭民謠，伊的旋律優雅婉轉，情感幼秀豐富，予人聽著就會當感受著到這內面所隱藏的故事佮情懷。這首歌曲的起源一直有誠濟種講法，其中尚予人知影的就是十六世紀英國國王亨利八世佮一個青樓女子兩個人之間一段淒美的故事。

聽講亨利八世去愛著一個茶店仔查某，毋閣這身分地位是天差咧地，茶店仔查某根本就毋敢數想這份情感，伊嘛無想欲予國王因為伊來毀掉一世英明，將按爾心掠坦橫拒絕國王的追求，國王就親手譜寫了這首《Greensleeves》，希望會當透過這首歌曲得著伊的芳心，歌詞內面有一句話 -「你穿著青色長䘼，我深愛的你卻是如此冷漠」，這句話就要算是亨利對這個青樓女子態度的描寫。就算是按爾亨利猶是得袂著青樓女子的愛，伊日思夜念總是無法度來給放袂記，最後就帶著這無盡的相思遺憾離世。 這故事聽起來是誠浪漫，猶毋閣歷史學家普遍攏認為，這首歌的風格較屬於文藝復興的晚期，而且無成是亨利八世在位當時的音樂風格，所以這段浪漫的故事應該是民間所編出來的。

無論真相如何，這段王室愛情的傳說無疑為《Greensleeves》加添了誠濟詩意佮想像。這首經典的歌曲經由YoYo的大提琴演繹，這份浪漫的情感閣較是放大到使人動容的地步。大提琴溫暖低沉的音色就敢若是亨利的心肝內底訴說彼份情感，音樂內面的轉折就像是青樓女子對亨利的拒絕。YoYo用著幼秀的琴音，給彼段愛情的張力佮深情表達甲誠生動感人，尤其是佇反覆的旋律中，大提琴奏出的每一個音符就親像是底重溫亨利的向望佮失落，最後沓沓仔消失去的尾聲，又閣敢若是對彼段愛情做無聲的告別。

透過YoYo的演奏，《Greensleeves》毋干焦是一首古早以前的歌謠，嘛成做是一段跨越時空的情感詩篇。無論這段傳說故事是真亦是假，這首歌攏會當予咱佇咧旋律中感受著愛情的美麗佮複雜，予聽的人佇心靈深處起著陣陣的水波痕。

文稿：西風 (第59屆廣播金鐘獎類型音樂主持人)