《Nessun dorma》(《公主徹夜未眠》)用台語紹介古早的旋律

《Nessun dorma》是無人睏會落眠的意思，華語給翻作《公主徹夜未眠》。這是義大利歌劇作曲家普契尼的代表作《杜蘭朵》內面一首經典的詠嘆調，以卡拉富王子堅心欲贏取冰冷公主愛意的深情告白作為核心，展現出咱人類心靈深處對光明佮幸福的向望。當東這旋律響起的時，就敢若是喚醒一段關係著勇氣佮愛情的夢境，尤其是到彼句逐家攏誠熟似的"Vincerò!"（我就欲勝利！）歌詞的時陣閣較是加添了信心的力量，加強著每一個聽著的人去追求夢想的勇氣。

YoYo用大提琴演藝這首不朽名作，傳統佮創新的交織為音樂帶來了全新的活力佮深度。

大提琴溫暖的音色，敢若是輕聲細說將卡拉富內心的熱情佮執一描繪了佮較感動人心。YoYo用著伊優卓的演奏技巧佮幼路的情感，重新詮釋這首傳統由男高音演唱的經典詠嘆嘆調，予充滿著詩意的旋律佇弓弦之間流轉。

大提琴演奏的時，《Nessun dorma》沓沓仔升起的前奏，就親像拍殕仔光的第一道貓霧光，透過琴弦傳達出一絲仔柔和佮希望；到中段的時旋律漸漸仔高漲，情感一層一層堆疊起去，大提琴低沉的音域佮豐富的張力就敢若予咱身處佇咧卡拉富的內心世界，感受著伊為愛戰鬥的無畏佮堅定。到了這首樂曲的高潮，那句充滿著力量的“Vincerò!”就敢若穿越時空，經由大提琴的重新詮釋，毋干焦觸動著耳腔，閣較是震撼著心靈。

YoYo大提琴的樂音，為咱拍開一片音樂的星空，將這首關係著愛佮信念的經典重新呈現佇世人的面頭前。佇YoYo的演繹下，《Nessun dorma》不再獨獨是歌劇中的一部分，是成作一場免用語言的情感共鳴，是一份獻給所有追求幸福、迎向挑戰的聽眾的禮物。

文稿：西風 (第59屆廣播金鐘獎類型音樂主持人)